Vanglaini: Home Minister R.Lalzirliana chuan, "Ralmuanna tichhetu hel pawlte leh, sualna tipunluntu khawchhak unaute lakah sorkarin khauh takin dan a kengkawh dawn a, Mizoram hi ralmuang taka siam sorkarin a tum a ni" a ti a; Khawchhak unaute chunga khauh an tum chu midangin dem phah dawn mah se, pawisa thei an nih tawh loh thu leh, dan anga huaisen taka kal an tum thu a sawi.

Home Minister hian nimin chhun khan ama office-ah Mizo Historial and Cultural Map, Dr R.L.Thanmawia buatsaih a tlangzarh a, tlangzarh inkhawma tel val upa rualte hnenah sorkarin khauh zawka dan kenkawh a tum thu a sawi.

Zira chuan, "State pawna mi hel pawlten mipuite an tihthlabar chuan na taka chhânlêt a ni ang. Eng hel pawl mah sorkarin khawi ngam a tum lo. A bikin HPCD-te phei chu Manipur state sorkar nen inkahhai an puang a, khawi hmunah mah activity an nei tur a ni lo. Mizoram mipui tana hnawksak zawnga an awm a thiang lo. Chhiah an khawn chuan ngaihzam an ni lo ang. Hmun thenkhata an chhiahkhawn lo puibawmtute pawh thubuai rip tak siamsak an ni," Home minister chuan a ti.

R.Lalzirliana chuan, "Khawchhak unaute zingah mi tha tam tak awm mah se, Mizorama sualna chi hrang hrang - inthah, inrawk, insuam, pawngsual leh ruihhlo tawlh thubuai tam ber hi Burma attanga lo kal kan unaute tih a nih avangin, Mizoram ralmuannain a chhiatphah nasa ta hle a, Foreigner Act hi khauh zawka kenkawh a, chumi bawhchhiate chu lak khawm a, dan anga thawn lêt a tul dawn ta tih hi sorkar ngaihdan a ni," a ti.

Khawchhak unaute chungah dan anga khauh taka an chêt tur thu a sawi a, he an thil tih avang hian politics-ah dem kai phah dawn pawh ni se, tihmakmawh a ni dawn tih Home Minister chuan a sawi.

Kum 10 eptu MLA a nih chhunga hel zalen dan te, tualthahna ualau tak tak pawh Police-ten an chhui chhuak thei lo a ngaimawh thinziate sawi chhuakin, sorkar thar a pian chinah Police-ten tualthahna khirhkhan leh inrawkna ril tak taka mawhphurtute pawh rang takin an man zel tawh tih Zira chuan a sawi bawk.

Mizo Historial and Cultural Map tlangzarhna inkhawm hi MAL President Lalthangfalan a kaihruai a, sawm bik val upa rual tlem rem rawmin an hmanpui a ni.